Ngalepas Touring Jeepers BPK Bali, Sekda Dewa Indra Nyumbungan BPK Antuk Ngamiletin Parikrama Bali
- 12 Januari 2020
- 18:57 WITA
- News
Balitopnews.com, Denpasar - Sekretaris Daerah Provinsi Bali Dewa Made Indra nyumbungan parikrama wanti warsa ke 73 Badan Pemeriksa Keuangan (BPK) Perwakilan Bali kadagingin antuk acare Touring Jeep kalanturang antuk acare Bali Resik Luhu Plastik ring Tahura, Ngurah Rai, Denpasar. "Titiang ngaturang agung suksemaning manah majeng ring BPK Perwakilan Bali, antuk kaledanganne nyarengin ngamiletin program prioritas Provinsi Bali inggih punika pelemahan sane resik, utamane resik antuk luhu plastik," baos Sekda Dewa Indra duk ngalepas pare pamilet touring pecinta jeep (Jeepers) ring natar Kantor BPK Bali, Redite semeng (12 Januari 2020)
Sekda Dewa Indra nganikayang, antuk kaledangan BPK Perwakilan Bali ring program ngareresik luhu punika nyihnayang kareketan instansi-instansi ring provinsi Bali, ten ngitungan instansi lokal utawi sane ngewalinin pusat. "Ngareresik pinaka sinalih tunggil program prioritas sane nedeng katincapang olih Pemprov Bali. "Swecan Widhi, ring wanti warsa ke 73 BPK ledang nyarengin ngamiletin parikrama sane dahat mabuat punika. Mogi benjang pungkur kareketan iraga puniki ngangsan becik lan nincap," pengapti birokrat sane mawit saking Pemaron, Buleleng puniki
Tios raris, Kepala BPK Perwakilan Bali Sri Haryoso Suliyanto ngangken touring jeep sane kalanturang antuk ngareresik ring Tahura Ngurah Rai, pinaka parikrama sane dahat mabuat antuk tetujon ngalestariang mangrove ring wewidangan punika "Iraga sami uning pemerintah provinsi Bali nedeng nincapang ngemargiang Bali Resik Luhu Plastik, punika mawinan titiang sareng ngamiletin," Sri Haryoso nuturang.
Dane negesan, ring dudonan wanti warsa ke 73 BPK utamane BPK Perwakilan Bali, tiosan saking acare Tour komunitas Jeep (Jeepers) puniki, taler kamargiang makudang-kudang pacentokan olahraga sane taler ngolemin makeh pamilet. Pucakne, ring pinanggal 20 Januari sane jagi rauh kalaksanayang upacara patinget lan pangayu bagy ring natar Kantor BPK Perwakilan Bali.
Selanturne Sekda Dewa Indra lan Kepala Perwakilan BPK Wilayah Bali sinarengan nyarengin touring nyujur Kawasan Tahura Mangrove, jagi ngalaksanayang ngareresik luhu plastik. Parikrama punika tios saking Kepala OPD ring wewengkon Pemerintah Provinsi Bali taler kasarengin olih pare siswa/i SMA/SMK ring wewidangan Denpasar. (Balitopnews.com/Ngr/Rls)
Komentar